John 13

Jisas nasaꞋopamam boꞋwagah alupumi ananimi siꞋi anona aman falafunai agel aꞋanai nandaꞋam

1Nemaf anama luꞋunai esis Juda saꞋ gwaꞋaimi amama Pasova owaꞋ ataꞋ notagai. Jisas nogawa nogota ananinai nataga eaꞋ ma nokwaha etap anaeꞋ nefeꞋma Ahalomana. EaꞋ okom ananinai nainaila epes ananisi sape etapi endilisi. NaꞋama deiꞋ nihiꞋambasa okom ananinai luꞋunai nainailas. 2EaꞋ wambomota anan naloma alupumi mape maꞋ gwaꞋaimi amama. EaꞋ Saimon nogalomana Judas Kariotinai nalomam mape. EaꞋ aman aonai Satan naliꞋ nafela nomonas Judasi ma nefeꞋ nihiꞋamba amam naumbih ma Jisas napoma. 3EaꞋ Jisas nogawa Ahalomana nandaꞋ anan laꞋifina ma numafi amamaga hiami. EaꞋ nogawa anan nape naloma God nafiꞋi eaꞋ nambimb notanima nefeꞋmana wapotiꞋ. 4EaꞋ nohafel natagaha siot launai ananinai nowahaꞋ anona taul. 5EaꞋ nakoloꞋ embel anom dis nafeꞋ notawa nasaꞋopamafa boꞋwagah afaꞋ alupufai ananifai eaꞋ nandaꞋ taul anama nowahaꞋanai nandisamafa boꞋwagah. 6NasaꞋopamafa boꞋwagah nafeꞋ, natagama Saimon Pita. EaꞋ Pita naꞋipana naꞋi, “Dembinai, nesaꞋopame boꞋwagah aeꞋami, owaꞋ.”

7EaꞋ Jisas nagwamana basef naꞋi, “IneꞋ owaꞋ negawa opeh amama aeꞋ deiꞋ andaꞋami. Anona nemaf ineꞋ negawam.”

8EaꞋ Pita naꞋipa Jisas naꞋi, “OwaꞋ. IneꞋ owaꞋ nesaꞋopa boꞋwagah aeꞋami, owaꞋ.”

EaꞋ Jisas nagwamana basef naꞋi, “IꞋi aeꞋ owaꞋ easaꞋopamena boꞋwagah ineꞋimi, ina nambimb nepe alupinai aeꞋinai, owaꞋ.”

9EaꞋ Saimon Pita nagwamana basef naꞋi, “Dembinai, ina nesaꞋopame boꞋwagah atom, owaꞋ. NesaꞋope hiꞋili lagof balaga wapotiꞋ motaga boꞋom.”

10EaꞋ Jisas nagwamana basef naꞋi, “Emi egafis sasaꞋof eaꞋ, esis ina atuwasi sesaꞋof wapotiꞋ, owaꞋ. Esis boꞋwes eaꞋ. IpeꞋ hipei ipeꞋ boꞋwepa eaꞋ. Anona ipeꞋinai atotona ataꞋ owaꞋ boꞋona andeandeꞋe.”

11DeiꞋ main? Anan nogawa emi egafuna nambimb nefeꞋ niꞋipa naumbih ananimi ma nihiꞋambamama neapoma.

EaꞋ naꞋipam naꞋi, “IpeꞋ hipei amboꞋwepa andeandeꞋ, eaꞋ anona ipeꞋinai atotona ataꞋ owaꞋ boꞋonai.”

12Anan nasaꞋopamam boꞋwagah amamumi eaꞋ, nala siot ananinai nafeꞋ natoma felefeleꞋma tebol. EaꞋ nahaliꞋam naꞋi, “IpeꞋ pegawa opeh amama aeꞋ andaꞋmepami o owaꞋ? 13IpeꞋ pefale tisa o Dembiwei, naꞋama andeandeꞋ. AeꞋ eaꞋ maꞋuwi, basef amama endilisimi atom. 14AeꞋ dembiwei tisa ipeꞋiwei. AeꞋ doꞋok asaꞋopa boꞋwagah ipeꞋimi. EaꞋ ipeꞋ wapotiꞋ pesaꞋopa boꞋwagah ipeꞋimi atona etin. 15AeꞋ eaꞋ ihiꞋambepa waf anama aeꞋanai. IpeꞋ pendaꞋam naꞋama etin siꞋi aeꞋ andaꞋam. 16DeiꞋ aeꞋ aꞋipipa basef endilisimi atom. Emi egafis agof aꞋasi sandaꞋ opeh etin, esis ina sape ilifa dembinai asasinai, owaꞋ. EaꞋ anona dembinai nasapaꞋ enin epen nafiꞋi, inima ina nikilaꞋ dembinai anama ananinai, owaꞋ. 17DeiꞋ ipeꞋ pegawa waf anama eaꞋ. IꞋi pilana andeandeꞋ, pendanifel.

18AeꞋ ina aꞋi ipeꞋ hipei pefeꞋ pewalapa basef piꞋipa naumbiha aeꞋ, owaꞋ. IpeꞋ boꞋwepa eaꞋ. AeꞋ egawepa andandepepa eaꞋ. EaꞋ basef Godi mail buk Baibeli atuwasi motaga endilisi ma anona aman nowalapa aeꞋ ma naumbih aeꞋami. Basef amama maꞋi naꞋama maꞋi,

ꞋAman anama neaꞋ gwaꞋaimi nealumai anona nemaf nigi boꞋwaga nofaꞋasa aeꞋ.’
19AeꞋ deiꞋ ape aꞋipipa basef amama ma waf anama ina deiꞋ nataga, ataꞋ owaꞋetin. Ama nambimb notaga nondawalap, ipeꞋ pembaleꞋefa aeꞋ eaꞋ maꞋuwi. 20AeꞋ aꞋipipa basef endilisimi, emi egafis sosoꞋ opalefa enin epen aeꞋ asapaꞋan nafiꞋi, esis sosoꞋ opalefa aeꞋ. EaꞋ emi egafis sosoꞋ opalefa aeꞋi, esis sosoꞋ opalefa Ahalome aeꞋanai wapotiꞋ nasapaꞋe afiꞋi.”

Atuwasi Judas niꞋipa amam naumbih ma Jisas napoma

(Mt 26:20-25; Mk 14:17-21; Lu 22:21-23)

21Jisas naꞋipafa basef amama eaꞋ, okom ananinai nimanina endilisi. EaꞋ naꞋipafa naꞋi, “AeꞋ aꞋipipa endilisi, anona afaꞋinai atuwasi nefeꞋ nihiꞋamba naumbih ma aeꞋ eapoma.”

22EaꞋ alupufai ananifai wandaꞋ tima etin wape. AfaꞋ ina ogawa Jisas naꞋi emi.

23AeꞋ alupuwei Jisasi, anan okom nainaila aeꞋi ape felefeleꞋma Anan. 24EaꞋ Saimon Pita nandaꞋ balaga naꞋipi naꞋi, “IneꞋ haliꞋago Anan naꞋi emi.”

25EaꞋ aeꞋ indikiꞋah afeꞋ felefeleꞋma Jisas ahaliꞋana aꞋi, “Dembinai, ineꞋ naꞋi emi?”

26EaꞋ Jisas nagwame naꞋi, “AeꞋ atuwasi ela bret dis esoꞋ anona, eaꞋ maꞋuna anan.”

EaꞋ nala bret dis nasoꞋ Judas Kariotinai Saimon nogalomana. 27EaꞋ ataꞋ nahapila bret etin, aman aonai Satan nawisana okom ananinai nomon.

EaꞋ Jisas naꞋipana naꞋi, “Opeh ineꞋ naꞋi neandaꞋami, daꞋam mehip.”

28AfaꞋ alupufai Jisasi wape waꞋ gwaꞋaimi, afaꞋ ina ogawa basef Jisasi ofagema, owaꞋ. 29Judas numafi otamba afaꞋimi. NaꞋama anom alupumi Jisasi ukup maꞋi Jisas naꞋipana ma nefeꞋ notala anom gwaꞋaimi ma nondaꞋ gwaꞋaimi amama o naꞋipana naꞋi noseꞋasa otamba isima kwahusi. 30EaꞋ Judas ataꞋ nahapila bret etin, nafeꞋ nawis andeꞋ mehip. EaꞋ owamb nataga.

MiꞋuli dambainai Jisasi

31Judas nafeꞋ nawis andeꞋ, Jisas naꞋipafa naꞋama naꞋi, “God nafela agel aeꞋanai luꞋuna. EaꞋ deiꞋ aeꞋ andaꞋ epes siti nafifili pepel ananinai sefela agel ananinai luꞋuna ma opeh aeꞋ andaꞋami. Esis sefela agel aeꞋanai aeꞋ ataga epen endilisiwei luꞋuna. EaꞋ sefela agel Ahalome Godi ma maol aeꞋ andaꞋanai wapotiꞋ. 32Amama atom Ahalome God wapotiꞋ nefela agel aeꞋanai luꞋuna deiꞋ atef. 33IpeꞋ soꞋupei, aeꞋ elomepa ope nogota bandana efeꞋ. IpeꞋ atuwasi pegolopa aeꞋ eaꞋ ina petolowe, owaꞋ. Anama aeꞋ eafeꞋma, ipeꞋ ina laꞋifipama nambimb peafoꞋo, owaꞋ. Basef amama atom fowaꞋ aꞋipa amam Juda, deiꞋ aꞋipipam wapotiꞋ. 34DeiꞋ aseꞋepa miꞋuli aeꞋanai dambainai ma ipeꞋ ukup ipeꞋimi mimila ipeꞋ atona etin siꞋi okom aeꞋanai nainailipa. EaꞋ naꞋama etin, ukup ipeꞋimi mimila ipeꞋ atona etin. 35IꞋi ukup ipeꞋimi mimila ipeꞋ atona etin, nambimb epes hiesi sogawa ipeꞋ alupipei aeꞋipei.”

Jisas naꞋipama Pita atuwasi nowaꞋ alafugama anan

(Mt 26:31-35; Mk 14:27-31; Lu 22:31-34)

36EaꞋ Saimon Pita nahaliꞋana naꞋi, “Dembinai, ineꞋ nefeꞋ eti?”

EaꞋ Jisas nagwamana basef naꞋi, “Anama deiꞋ aeꞋ eafeꞋma, ina nambimb nigiꞋmi nefoꞋo, owaꞋ. EaꞋ owagama ineꞋ nigiꞋmi nefoꞋo.”

37EaꞋ Pita nahaliꞋana naꞋi, “Dembinai, deiꞋ maina aeꞋ ina laꞋifiwi ma deiꞋ igiꞋmina efoꞋo? AeꞋ aꞋi aꞋe ma egaꞋ ma iegiambamena.”

38EaꞋ Jisas nagwamana basef naꞋi, “IneꞋ naꞋi aꞋe endilisi ma neagaꞋ ma niegiambama aeꞋ aꞋ amon? AeꞋ aꞋipina endilisi, deiꞋ owamb anaeꞋ awata ataꞋ owaꞋ neandaꞋam, ineꞋ nembahoꞋ agel aeꞋanai niꞋi wenif niꞋi, ‘AeꞋ owaꞋ egawa Jisase.’ ”